Thursday, November 12, 2009

Berita Pemansang Pelajar Menua Pesisir



Berita tu ayan ba Utusan Borneo, Guru Besar En. Julius Urie, ngari ka sekula sereta PIBG meri besai terima kasih ngagai bala ti mantu sekula/PIBG begiga ka belanja di kena mai bala nembiak nemuai, laban taun tu SK Ulu Machan enda ampit nerima bantu ari Opis Pelajar belanja kena nemuai.

Iya mega ngenatai ka terima kasih ngagai Utusan Borneo ti mansut ka gambar sida lebuh ti nemuai ngagai Timber Museum di Wisma Sumber Alam Petra Jaya Kuching.


Berita ayan ba Utusan Borneo kena 10/11/2009

n

Saturday, November 7, 2009

Nembiak SK Ulu Machan Nemuai ke Kuching

Sekeda sekula di menua pesisir bisi ngatur penemuai bala nembiak, apai indai enggau bala pengajar ngagai sekeda alai ti tau meri pengelantang enggau belajar ka penemu baru.

Guru Besar, En. Julius Urie, ti nyadi tuai rombongan SK Ulu Machan, madah ka pengaga sereta pemegah ati laban sekula tu, taja di ulu sungai, kira ulih semekih enggau sekula bukai ba semua pengawa, pemutus peresa enggau kerjasama sereta sukung bala mayuh.

Taun tu, sida iya ngatur penemuai ke Kuching kali kedua, belabuh ari 5 - 7 Nov. 2009, terubah SK Ulu Machan nemuai ka Kuching dalam taun 2007. Dalam 2008 kemari penemuai sida iya ke Bintulu terus ke Miri.

Penemuai sekali tu ke Kuching, bala raban, 10 pengajar enggau kakitangan sekula, 2 AJK PIBG, sereta 35 nembiak taun 5 enggau 6.



Guru Besar, En. Julius Urie (Baju Biru)



guru Besar begambar enggau bala Pengajar sereta Kakitangan Sekula


Sekeda nembiak SK Ulu Machan begambar bekau ke nemuai ngagai Muzium Kayu di Petra Jaya


Nembiak begambar dalam Muzium Kayu STIDC


Apai Jay (Sibat Ak Nyanggau), siko ari Kakitangan SK Ulu Machan

Tuesday, October 20, 2009

Pemansang ti Seruran di anti

Ngenatai ka pengaga ati ngagai semua bala di pelilih Kanowit. Berita pemansang ti ayan ba surat berita nya tentu amat mai pengaga sereta pengandal semua bala ti diau di Kanowit. Taja pan ukai semua bisi penguntung bebeli ka rumah murah enggau kena pemansang tanah, tang pemansang ti kena perchik ti ukai tentu bisi terus ngagai setiap tubuh, sereta nerima penguntung bukai, baka jalai pesisir enggau nambah ka rural growth centre. Sekeda tega ti diau di menua ulu bisi peluang sereta mampu bebeli ka rumah semak pasar awak ka bala anak enggau bala uchu semak sekula enggau semak klinik.

Pengarap sereta pengandal bala mensia mayuh ti diau di pelilih Kanowit enggau bala kaban belayan ti nitih ka periuk ti jauh nyepar ari Kanowit, semampai besampi minta pemansang nya datai enggau jampat, ukai 10 tauka 5 taun ti ka datai, tang meh naka penyampat iya. Jangka aku nadai kebuah agi ga pemansang nya be anti-anti laban berita ti ayan ba surat khabar nya udah madah ka duit ungkus ngaga pemansang nya udah sedia.




Pasar Kanowit


Berita pemansang ti deka datai di Kanowit ti ayan ba surat berita


Berita pemansang di menua pesisir di sadang ulih ngangkat ka tikas pendiau enggau tikas pengidup ti ayan ba surat berita

Wednesday, October 14, 2009

Sekeda ari Berita Sinu


Ngenatai ka penyinu ati ngagai bala ti kena tuntung penusah, Jonnwin Ak Penghulu Umpi sebilik di Rh. Barnabas Kadom Semedang Baru sereta Henry Ak Umping sebilik di Rh Jampung Nanga Jerangku.

Jonnwin kena tuntung penusah kena minggu dulu tu kemari. Anak tuai iya ti agi belajar ba Politeknik Kuching kena eksiden ba jalai raya enda jauh ari Pasar Machan lalu ngujung ka anak lelaki iya lesi bebadi. Bisi macha berita ba surat khabar, pia mega pansut pesan ba radio, minta ampun ngagai kita sebilik Win laban sekeda bala kaban belayan kitai enda sempat ngesah maya nuan kena penusah, tang taja pia bala kitai sekaban di Sibu, Julau, Mukah, Kanowit ti bisi ninga berita bisi ngenatai ka diri.

Henry Ak Umping sereta sida sebilik mega kena tuntung penusah, di tinggal ka apai sida iya ti kena sakit buah pinggang 2 minggu nyin suba. Pengawa basa niang apai sida iya, ngetas ulit lalu muai tebalu kena 11/10/2009 tu tadi. Mayuh kaban belayan datai ngesah pengawa sida di Rh Jampung Ng. Jerangku.

Berita kaban belayan ti lesi bebadi bukai enda temu, nya alai nadai di kenang ditu, taja pia kitai sama besampi ka semengat sida iya, semengat sida ti lesi bebadi diau begulai enggau semua orang sante. Pia mega kitai sama besampi ka sida ti kena tuntung penusah, ngarap ka sida gerai ba tubuh sereta gerai ba runding kena sida nerus ka pengidup enggau pemaik dalam dunya tu.


Sekeda berita dalam gambar:-


Ngetas ulit basa ka Niang Umping Ak Mapang



Manggi ngari ka sida menyadi bejaku ka adat basa tebalu


Indai Falicka bejaku ka adat tebalu ngari ka bala menyadi Niang Umping


TR Petay ngenatai ka jaku adat basa ngari ka bala bini Niang Umping


Sekeda bala kaban belayan ti sama datai


Bini Niang Umping di kupas ari semua penti pemali nitih ka adat Iban -muai tebalu


Pemakai sereta utai di irup udah sedia, pengudah semua adat di titi di tali ari ngetas ulit sampai ka muai tebalu


Pemancha Jantan seduai Indai Falicka ngungkup ka sen pemali adat basa tebalu ngagai semua kaban belayan sepiak Niang Umping


Thursday, June 18, 2009

Berita Pemansang Rumah Tangga


Ngenatai ka pengaga ati ngagai Sirai seduai Endun Regina, laban ti udah mujur niri ka ruang bilik serambau enggau Gawai tu tadi. Kami besampi ka seduai lantang senang begulai sampai ka jemah ila.

Pengerami melah pinang seduai tu tadi ba Rh Jampong Ng Jerangku Machan, di gulu mayuh bala kaban belayan ti datai ari jauh enggau ti semak. Sekeda kaban belayan datai ari Lingah Pakan, Bintangor, Julau, Sibu sereta Miri.



Selamat Melah Pinang ka seduai Igat Sirai & Endun Regina





Untam Apai Mang, apai pengantin indu bejaku ngelalu ka penatai bala mayuh



TR Mathew Dana, Apai pengantin lelaki ngenatai ka jaku pengaga ati



Apai Sirai seduai Apai Mang begambar begulai enggau anak seduai ti di rami ka malam nya




Friday, February 6, 2009

Machan kena Penusah Bah

Sinu ninga berita ari Machan. Pasar Machan kena bah, sekeda bala pindah sentara ba sekula China atas bukit belakang pasar, tang bisi ga sekeda diau ba langkau arau, baka sida Rimbo ti bisi ayan ba surat berita.

Taun tu semak seminggu bah tang enda nyengala dalam banding enggau bah taun dulu nyin kemari.



Berita ti ayan ba Borneo Post 6/2/2009


Thursday, January 1, 2009

Selamat Taun Baru


TR Barnabas Kadom, ti nyadi Chairman SDNU Pampang Machan ngari ka Kaban Komiti SDNU ngenatai ka "Selamat Taun Baru" ngagai semua bala "orang Machan" ti jauh enggau semak.

Nitih ka berita, program SDNU Machan taun 2009 deka majak nambah ka kaban baru awak kena nyerakup ka bala mayuh di Machan. Program bukai ti deka di atur deka di padah baru laban nganti pemutus ari Meeting Komiti SDNU Pampang Machan.

"Selamat Taun Baru 2009"

"Segulai, Sejalai & Sepenemu" dalam SDNU