Pemansang ti Seruran di anti

Ngenatai ka pengaga ati ngagai semua bala di pelilih Kanowit. Berita pemansang ti ayan ba surat berita nya tentu amat mai pengaga sereta pengandal semua bala ti diau di Kanowit. Taja pan ukai semua bisi penguntung bebeli ka rumah murah enggau kena pemansang tanah, tang pemansang ti kena perchik ti ukai tentu bisi terus ngagai setiap tubuh, sereta nerima penguntung bukai, baka jalai pesisir enggau nambah ka rural growth centre. Sekeda tega ti diau di menua ulu bisi peluang sereta mampu bebeli ka rumah semak pasar awak ka bala anak enggau bala uchu semak sekula enggau semak klinik.

Pengarap sereta pengandal bala mensia mayuh ti diau di pelilih Kanowit enggau bala kaban belayan ti nitih ka periuk ti jauh nyepar ari Kanowit, semampai besampi minta pemansang nya datai enggau jampat, ukai 10 tauka 5 taun ti ka datai, tang meh naka penyampat iya. Jangka aku nadai kebuah agi ga pemansang nya be anti-anti laban berita ti ayan ba surat khabar nya udah madah ka duit ungkus ngaga pemansang nya udah sedia.

Pasar Kanowit

Berita pemansang ti deka datai di Kanowit ti ayan ba surat berita

Berita pemansang di menua pesisir di sadang ulih ngangkat ka tikas pendiau enggau tikas pengidup ti ayan ba surat berita

Sekeda ari Berita Sinu

Ngenatai ka penyinu ati ngagai bala ti kena tuntung penusah, Jonnwin Ak Penghulu Umpi sebilik di Rh. Barnabas Kadom Semedang Baru sereta Henry Ak Umping sebilik di Rh Jampung Nanga Jerangku.

Jonnwin kena tuntung penusah kena minggu dulu tu kemari. Anak tuai iya ti agi belajar ba Politeknik Kuching kena eksiden ba jalai raya enda jauh ari Pasar Machan lalu ngujung ka anak lelaki iya lesi bebadi. Bisi macha berita ba surat khabar, pia mega pansut pesan ba radio, minta ampun ngagai kita sebilik Win laban sekeda bala kaban belayan kitai enda sempat ngesah maya nuan kena penusah, tang taja pia bala kitai sekaban di Sibu, Julau, Mukah, Kanowit ti bisi ninga berita bisi ngenatai ka diri.

Henry Ak Umping sereta sida sebilik mega kena tuntung penusah, di tinggal ka apai sida iya ti kena sakit buah pinggang 2 minggu nyin suba. Pengawa basa niang apai sida iya, ngetas ulit lalu muai tebalu kena 11/10/2009 tu tadi. Mayuh kaban belayan datai ngesah pengawa sida di Rh Jampung Ng. Jerangku.

Berita kaban belayan ti lesi bebadi bukai enda temu, nya alai nadai di kenang ditu, taja pia kitai sama besampi ka semengat sida iya, semengat sida ti lesi bebadi diau begulai enggau semua orang sante. Pia mega kitai sama besampi ka sida ti kena tuntung penusah, ngarap ka sida gerai ba tubuh sereta gerai ba runding kena sida nerus ka pengidup enggau pemaik dalam dunya tu.

Sekeda berita dalam gambar:-

Ngetas ulit basa ka Niang Umping Ak Mapang

Manggi ngari ka sida menyadi bejaku ka adat basa tebalu

Indai Falicka bejaku ka adat tebalu ngari ka bala menyadi Niang Umping

TR Petay ngenatai ka jaku adat basa ngari ka bala bini Niang Umping

Sekeda bala kaban belayan ti sama datai

Bini Niang Umping di kupas ari semua penti pemali nitih ka adat Iban -muai tebalu

Pemakai sereta utai di irup udah sedia, pengudah semua adat di titi di tali ari ngetas ulit sampai ka muai tebalu

Pemancha Jantan seduai Indai Falicka ngungkup ka sen pemali adat basa tebalu ngagai semua kaban belayan sepiak Niang Umping

Berita Pemansang Rumah Tangga

Ngenatai ka pengaga ati ngagai Sirai seduai Endun Regina, laban ti udah mujur niri ka ruang bilik serambau enggau Gawai tu tadi. Kami besampi ka seduai lantang senang begulai sampai ka jemah ila.

Pengerami melah pinang seduai tu tadi ba Rh Jampong Ng Jerangku Machan, di gulu mayuh bala kaban belayan ti datai ari jauh enggau ti semak. Sekeda kaban belayan datai ari Lingah Pakan, Bintangor, Julau, Sibu sereta Miri.

Selamat Melah Pinang ka seduai Igat Sirai & Endun Regina

Untam Apai Mang, apai pengantin indu bejaku ngelalu ka penatai bala mayuh

TR Mathew Dana, Apai pengantin lelaki ngenatai ka jaku pengaga ati

Apai Sirai seduai Apai Mang begambar begulai enggau anak seduai ti di rami ka malam nya

Machan kena Penusah Bah

Sinu ninga berita ari Machan. Pasar Machan kena bah, sekeda bala pindah sentara ba sekula China atas bukit belakang pasar, tang bisi ga sekeda diau ba langkau arau, baka sida Rimbo ti bisi ayan ba surat berita.

Taun tu semak seminggu bah tang enda nyengala dalam banding enggau bah taun dulu nyin kemari.

Berita ti ayan ba Borneo Post 6/2/2009

Selamat Taun Baru

TR Barnabas Kadom, ti nyadi Chairman SDNU Pampang Machan ngari ka Kaban Komiti SDNU ngenatai ka "Selamat Taun Baru" ngagai semua bala "orang Machan" ti jauh enggau semak.

Nitih ka berita, program SDNU Machan taun 2009 deka majak nambah ka kaban baru awak kena nyerakup ka bala mayuh di Machan. Program bukai ti deka di atur deka di padah baru laban nganti pemutus ari Meeting Komiti SDNU Pampang Machan.

"Selamat Taun Baru 2009"

"Segulai, Sejalai & Sepenemu" dalam SDNU

Berita ari Sekula

Tu siti berita ti ayan ba Borneo Post kena 10.11.2008. Berita singkang pemansang pengawa tauka aktiviti ti bisi diatur ba sekula.

Ngenatai ka pengaga ati ngagai bala Cikgu ba SMK Kanowit, besampi ka semua kita mujur magang dalam semua pengawa, lebih agi nempa nembiak nuju pemujur ba pelajar sekula ukai nangka pom lima enggau pom enam tang mujur datai ngagai Universiti.

Sistem Tagang

Aram Makai Semah sambil kitai Picnic


TR Sandai enggau TR Kayan sereta Raban Komiti Pemansang rumah panjai udah netap ka hari, maya "Harvest System Tagang" di Machan.

Hari Bulan: 29 - 30 Nov 2008
Tempat: Sungai Mangut Machan Kanowit

Bala ti semaya deka datai ngulu pengawa tu di tesau datai ba Pasar Machan sebedau pukul 10.00 pagi kena 29 Nov 2008.

Bala bukai enti bisi ati deka enggau ngenatai ka diri, tau mega betanya ari TR Sandai (019 - 4673027)

Berita ti silik tau mega di peda ba - http://rhsandaimangut.blogspot.com/

Bala mayuh sigi di pinta sereta di lalu ka penatai ngulu pengawa tu, pengawa ti terubah di atur ba menua bagi Sibu.