Thursday, December 9, 2010

Bala Nembiak SK Ulu Machan Nemuai ke Kuching

Bala pengajar sereta nembiak lalu di sempulang kaban PIBG SK Ulu Machan sekali agi nemuai ngagai sekeda endor di Kuching.

Penemuai sekali tu mega diketuai ka Kepala Pengajar En. Julius Urie.

Sida mega bepulang nemuai sekejap ngagai WaiFM (Bagi Iban) taja pan kena hari minggu. Kelimpah ari WaiFM sida mega bisi nemuai ngagai Timber Muzium di Wisma Sumber Alam sereta Dewan Undangan Negeri ti baru, kelimpah ari sekeda endor ti tau ngelantang ka ati baka ba Kuching Waterfront enggau Museum Sarawak.

Sida iya udah mujur mulai ka diri Ka Machan kena pagi 1/11/2010. Minta ampun laban berita sida iya laun di ayan dalam NALAN BERITA tu.

Taja pia, ngena peluang tu, aku ngenatai ka "Selamat Permisi" ngagai semua kita Cikgu sereta nembiak" di SK Ulu Machan. Arap ka kita terus nan ka pemanah pemutus UPSR ba peringkat Daerah Kanowit taun dudi tu ila.



Pengajar, Kaban PIBG sereta Nembiak ari SK Ulu Machan nganti diri di bai masuk ngagai County WaiFM


Agi nganti DJ Insin Kibong ti di asuh En. Laja Sanggin, Tuai Bagi Iban WaiFM Kuching


DJ WaiFM ngujung ka program Jaku Iban jam 3.00 lemai


DJ ari Program Jaku Kayan Kenyah


Rombongan masuk ke County WaiFM


Bala pengajar sereta sekeda nembiak nganti sepiak County


Cikgu Julius dengan Pegawai RTM

CDA

Thursday, July 15, 2010

Gawai Bala Tuai Rumah Pelilih Machan


Selamat Gawai ari bala Tuai Rumah ari pelilih Machan. Taun tu meh terubah bala raban Tuai-Tuai Rumah di Machan "Begulai Sejalai Sepenemu" ngatur pengerami Gawai ba Dewan Masyarakat Machan kena 27.6.2010 lemai.

Kada enda bala kita Tuai Rumah ari Machan ti terubah ngatur pengerami Gawai ka bala Tuai Rumah di seluruh Sarawak kini? Manah meh nya, kami pan numpang segelas pengaga sereta arap ka bala kita anang jera ngatur pengerami nya ukai naka nya aja. Pengerami bukai tau meh di atur kena ngangau sereta ngangkat ka kaul semua JKKK rumah panjai pelilih Machan.

Pengerami tu tadi, ninting JKKK rumah panjai di pinta nangkup siti meja kelimpah ari meja Tuai Rumah. Enda kurang ari 45 iti meja bela di pesaup ka bala mayuh. Senenjik amat kami sebuat pan bisi mansa lalu numpang sekaki, di belakang lalu sekali dua kena tarit nguji ka singkang "pucu-pucu".

Tuai Pengabang ka malam nya YB Datuk Gramong Juna lalu di sempulang DO En. Bobby Yamoh sereta KPD ASP Lanying. Bala Tuai-Tuai Masyarakat pelilih Kanowit mega mayuh ngenatai ka diri malam nya.

Berita ti ayan ba Borneo Post


Sekeda bala mayuh


Peluang begambar enggau kaban lama, Awang Unau enggau bini iya sereta TR Samsudin


Ex-Pemancha Jantan bekunsi ka cherita mai ketawa


Raban JKKK ari Rh. Sandai Mangut


Bala pengabang di sambut enggau ai tuak ba mua pintu


aab

Tuesday, June 15, 2010

Pemansang Ti Di Anti Bala Mayuh

Menua Sarawak udah merintah diri kenyau 1963. Mayuh pemansang udah di gaga kena ngangkat ka pendiau pengidup rakyat di seluruh menua Sarawak.

Ninting taun perintah ngungkup ka duit enda kurang ari 3 beliun kena ngemansang ka pelajar sekula, 3 beliun ka pemansang utility (api/ai), 3 beliun kena ngangkat ka pengidup orang berikan, 5 beliun kena mantu orang bumai betupi sereta enda kurang 10 beliun kena ngangkat ka infrastruktur seluruh Sarawak.

Tang ari bebeliun duit pemansang ti di agih nya, sekeda menua enda di ungkup setipak enggau pemesai menua sereta pemayuh tubuh mensia ti nguan. Sekeda menua di wan enda lebih ari 100 tubuh tang di bubuh ka duit kena ngemansang ka endur nya nyau lebih ari 100 milliun ringgit. Sekeda menua kerapa, paya kampung jerung, pulau nadai di wan nyumbuh di gaga ka jalai laban di kena narit pemansang ke dudi hari. Bah, keran mega ati deka narit enggau beampit ka pemansang ke ulu sungai ngicha ka kaban belayan, bala ibu bala aya enggau bala petunggal bela ampit ngasai ka sekeda ari singkang pemansang menua, tang nadai meh daya, udah di gerah pemansang ukai ungkup sida ke diau di ulu sungai.

Sekeda menua ulu ti tebal di wan mensia baka Iban, Kayan, Kenyah enggau Kelabit deka di ampit pemansang jalai tang nyangka nganti 50 taun da ti deka datai, laban agi bekalimat ka duit ti bedau DI PASUK KA DALAM BUDGET, tambah mega naka kediatu semina agi besadung ka sekarung dua guni baja lalu di tudung enggau singkap atap sing, lalu taun dudi deka di ganti enggau singkap spendex.

Lebuh ke besilak ka surat berita, gaga ga tudah diri, andal amat meh ati laban udah 49 taun Sarawak di kumbai MERDEKA, baru diatu ninga berita Jalai deka di gaga ari Kanowit-Song-Kapit. Jalai nya tentu mega nemu beranak besimpang kiba besimpang kanan nuju sekeda rumah panjai.

Besampi mega ngasuh jalai nya mayuh anak lalu mayuh mega uchu ngicha datai ba kaki tangga sekeda rumah panjai bala Iban di Ulu Machan, Ulu Majau, Ulu Poi, Ulu Ngemah enggau Ulu Katibas.

Terima kasih meh ngagai PERINTAH, taja pan jalai nya udah laun tang anang ga agi beanti-anti enggau mayuh macham daleh enggau leman. Arap ka jalai nya di gaga diatu lalu di kena 2014 ila.


Berita ti ayan ba Utusan Borneo


Berita ari Kanowit ayan ba Utusan Borneo

cda

Wednesday, June 9, 2010

Gawai 2010


YB Datuk Gramong Juna Ngabang Gawai di Ulu Sungai


Kena lemai 1/6/2010, bala ba Rh Sandai enggau Rh Kayan Ulu Machan berasai amat betuah laban ti terubah iya YB Datuk Gramong Juna ngabang Gawai Dayak taja pan iya udah nyadi Pengari Sitak Machan kenyau ari 1975 kelia.

Penemuai iya enda bulih sejam duduk di ruai, udah umbas mega ngayan ka mua kena mandang ka iya berat ka pemedis pengidup di ulu sungai, pia ku TR Kayan.

Lebuh ti berandau ngerampasa ba Rh. Kayan enggau Rh Sandai, YB Datuk Gramong madah ka diri ngelama tu semina ngabang ba rumah panjai tisi jalai Kanowit enggau Machan. Taun tu kira betuah meh bala di Ng Menalun Poi enggau Mangut Machan laban ti kena lawa YB Datuk Gramong & Datin Catherine, DO En. Bobby Yamoh & Mrs, sereta KPD ASP Lanying & Mrs. ngena Helicopter.

Ba randau nya mega YB Datuk Gramong di pinta ngenatai ka Insentif pelajar ka nembiak ari Rh Sandai ti mujur enggau manah ba peresa UPSR, PMR enggau SPM 2009 nyin kemari.


YB Datuk Gramong Juna ngenatai ka sekeda berita Gawai ba Rh Kayan


Terubah YB Datuk Gramong Juna Ngabang Gawai ba Rh Sandai Mangut Machan


Terubah YB Datuk Gramong Juna ngabang Gawai di menua ulu sungai ba Rh Kayan


YB Datuk Gramong nyua ka Insentif Pelajar ti mujur enggau manah ba SPM 2009 ba Rh Sandai


YB Datuk Gramong nyua ka Insentif Pelajar ti mujur ba PMR 2009 ba Rh Sandai


Indai Rose ari Rh. Sandai nerima Insentif Pelajar ka Pemujur Uchu ia ba UPSR 2009


YB Datuk Gramong nyua ka perais melukis ka nembiak ba Rh Kayan


TR Sandai seduai TR Kayan ngulu ka bala bukai begambar enggau YB Datuk Gramong Juna


Pemulai YB Datuk Gramong ari Mangut



cda